1ܝܼܗܘܼܕܵܐ؛ ܪܹܓܵܐ ܕܝܼܫܘܿܥ ܡܫܝܼܚܵܐ؛ ܘܐܵܚܘܿܢܵܐ ܕܝܲܥܩܘܿܒ؛ ܠܐܵܢܝܼ ܕܝܼܢܵܐ ܩܸܪ̈ܝܹܐ؛ ܡܘܼܚܸܒܹ̈ܐ ܒܐܲܠܵܗܵܐ ܒܵܒܵܐ؛ ܘܢܛܝܼܪܹ̈ܐ ܒܝܼܫܘܿܥ ܡܫܝܼܚܵܐ؛ 2ܪ̈ܲܚܡܹܐ ܘܫܠܵܡܵܐ ܒܚܘܼܒܵܐ ܙܵܝܸܕ ܠܵܘܟܼܘܿܢ. 3ܡܘܼܚܸܒܹ̈ܐ؛ ܟܲܕ ܟܠܵܗ̇ ܚܲܡܚܘܵܪܘܼܬܵܐ ܒܸܥܒܼܵܕܵܐ ܝ݇ܘܸܢ ܗَܘܵܐ ܠܸܟܬܵܒܼܵܐ ܐܸܠܵܘܟܼܘܿܢ ܥܲܠ ܚܲܝܹ̈ܐ ܕܝܼܲܢ ܕܓܵܘܵܐ؛ ܦܸܫܠܝܼ ܡܘܼܠܝܸܨܵܐ ܠܸܟܬܵܒܼܵܐ ܐܸܠܵܘܟܼܘܿܢ؛ ܟܲܕ ܦܲܪܦܘܼܠܹܐ ܝ݇ܘܸܢ ܕܐܵܓܼܘܿܢܵܐ ܥܵܒܼܕܝܼܬܘܿܢ ܒܚܵܬܸܪ ܕܗܲܝܡܵܢܘܼܬܵܐ؛ ܗ̇ܝ ܕܗܲܪ ܚܕܵܐ ܓܵܗܵܐ ܦܸܫܠܵܗ̇ ܣܘܼܦܝܼܬܵܐ ܠܩܲܕܝܼܫܹ̈ܐ. 4ܣܵܒܵܒ ܕܥܒܼܸܪܗ݇ܘܿܢ ܒܛܸܫܘܵܐ ܐ݇ܢܵܫܹ̈ܐ؛ ܐܵܢܝܼ ܕܡ̣ܢ ܩܵܕܝܼܡܝܼ ܦܸܫܠܗ݇ܘܿܢ ܟܬܝܼܒܼܹܐ ܠܐܵܗܵܐ ܓܘܵܢܵܗܟܵܪܘܼܬܵܐ؛ ܐ݇ܢܵܫܹ̈ܐ ܟܵܦܘܿܪܹ̈ܐ؛ ܘܠܫܵܦܵܩܲܬܹܗ ܕܐܲܠܵܗܲܢ ܡܲܕܘܼܪܹ݂ܐ ܝ݇ܢܵܐ ܠܦܲܚܙܘܼܬܵܐ؛ ܘܠܗ̇ܘ ܕܝܼܠܹܗ ܒܢܲܦ̮ܫܹܗ ܐܵܓܼܵܝܲܢ ܘܡܵܪܲܢ؛ ܝܼܫܘܿܥ ܡܫܝܼܚܵܐ؛ ܟܹܐ ܣܵܪܒܼܝܼ. 5ܐܝܼܢܵܐ ܠܡܲܕܟܲܪܬܵܘܟܼܘܿܢ ܒܸܒܥܵܝܵܐ ܝ݇ܘܸܢ؛ ܟܲܕ ܚܕܵܐ ܓܵܗܵܐ ܝܕܸܥܠܵܘܟܼܘܿܢ ܟܠ ܡܸܢܕܝܼ؛ ܕܡܵܪܝܵܐ ܟܲܕ ܠܛܵܝܸܦܵܐ ܡ̣ܢ ܐܲܪܥܵܐ ܕܡܸܨܪܹܝܢ ܦܘܼܪܸܩܠܹܗ؛ ܗ̇ܝ ܕܬܲܪ̈ܬܹܝ ܠܐܵܢܝܼ ܕܠܵܐ ܗܘܼܡܸܢܘܿܢ ܬܘܼܠܸܩܠܹܗ. 6ܘܠܡܲܠܲܐܟܹ̈ܐ؛ ܐܵܢܝܼ ܕܠܵܐ ܢܛܸܪܘܿܢ ܪܹܫܵܢܘܼܬܵܝܗܝ؛ ܐܸܠܵܐ ܫܒܼܸܩܠܗ݇ܘܿܢ ܥܡܵܪܵܐ ܕܝܼܵܝܗܝ؛ ܢܛܝܼܪܵܝܠܹܗ ܠܕܝܼܘܵܢ ܕܝܵܘܡܵܐ ܓܘܼܪܵܐ ܒܝܸܣܘܼܪܹ̈ܐ ܕܠܥܵܠܲܡ ܬܚܘܿܬ ܚܘܼܒܼܝܵܐ. 7ܕܵܐܟܼܝܼ ܕܣܕܘܿܡ ܘܥܵܡܘܿܪܵܐ ܘܡܕܝܼܢܵܬܹ̈ܐ ܕܚܵܕܸܪ̈ܘܵܢܵܝܗܝ؛ ܟܲܕ ܗܲܪ ܒܕܡܘܼܬܵܐ ܕܐܲܢܹܐ ܙܢܹܐܠܗ݇ܘܿܢ؛ ܘܐ݇ܙܸܠܗ݇ܘܿܢ ܒܵܬ݇ܪ ܒܸܣܪܵܐ ܐ݇ܚܹܪ݇ܢܵܐ؛ ܡܘܼܬܒܹܐ ܝ݇ܢܵܐ ܠܛܘܼܦ̮ܣܵܐ؛ ܟܲܕ ܩܵܒܠܝܼ ܕܝܼܘܵܢ ܕܢܘܼܪܵܐ ܕܗܲܠ ܥܵܠܲܡ. 8ܗܲܪ ܒܐܵܗܵܐ ܬܵܗܲܪ ܐܘܼܦ ܐܲܢܹܐ ܚܵܠܡܵܢܹ̈ܐ ܠܒܸܣܪܵܐ ܟܹܐ ܟ̰ܲܦܠܸܢܝܼ؛ ܘܠܡܵܪܘܼܬܵܐ ܟܹܐ ܡܲܣܠܝܼ؛ ܘܠܚܸܩܪܹ̈ܐ ܟܹܐ ܓܵܕܦܝܼ. 9ܐܝܼܢܵܐ ܡܝܼܟܼܵܐܹܝܠ ܪܹܫܵܐ ܕܡܲܠܲܐܟܹ̈ܐ؛ ܗ̇ܘ ܕܥܲܡ ܐܵܟܼܸܠܩܲܪܨܵܐ ܟܲܕ ܡܲܩܪܘܼܨܹܐ ܘܒܸܕܪܵܫܵܐ ܗ݇ܘܵܐ ܥܲܠ ܦܲܓܼܪܹܗ ܕܡܘܼܫܹܐ؛ ܠܵܐ ܩܘܼܫܕܸܪܹܗ ܕܡܲܝܬ݇ܝܹܐ ܗَܘܵܐ ܥܲܠܘܼܗܝ ܕܝܼܘܵܢ ܕܓܘܼܕܵܦܵܐ؛ ܐܸܠܵܐ ܐَܡܝܼܪܹܗ؛ ܢܵܓ̰ܘܼ ܒܝܼܘܼܟܼ ܡܵܪܝܵܐ. 10ܘܐܲܢܹܐ ܒܐܵܢܝܼ ܕܠܹܐ ܝ݇ܢܵܐ ܒܝܼܕܵܥܝܵܐ ܟܹܐ ܓܵܕܦܝܼ؛ ܘܒܐܵܢܝܼ ܕܟܝܵܢܵܐܝܼܬ ܐܲܝܟܼ ܚܲܝ̈ܘܵܬܵܐ ܚܲܪ̈ܫܹܐ ܒܵܠܵܕ ܝܼܢܵܐ؛ ܒܐܲܢܹܐ ܟܹܐ ܡܲܚܪܸܒܼܝܼ ܓܵܢܵܝܗܝ. 11ܘܵܝ ܐܸܠܵܝܗܝ ܕܒܐܘܼܪܚܹܗ ܕܩܵܐܹܝܢ ܐ݇ܙܸܠܗ݇ܘܿܢ؛ ܘܒܵܬ݇ܪ ܚܸܠܛܘܼܢܵܝܘܼܬܹܗ ܕܒܸܠܥܵܡ ܒܗܵܩܵܐ ܪܘܼܦܹܠܗ݇ܘܿܢ ܓܵܢܵܬܵܝ̈ܗܝ ܘܒܥܵܨܝܼܘܼܬܹܗ ܕܩܘܼܪܚ ܬܠܸܩܠܗ݇ܘܿܢ. 12ܐܲܢܹܐ ܝ݇ܢܵܐ ܡܘܼܡܹ̈ܐ ܓܵܘ ܡܸܫܬܘܼܝܵܬܵܘ̈ܟܼܘܿܢ ܕܚܘܼܒܵܐ؛ ܐܝܼܡܲܢ ܕܥܵܒܼܕܝܼ ܡܸܫܬܘܼܬܵܐ ܥܲܡܵܘܟܼܘܿܢ؛ ܡܲܪ̈ܥܝܵܢܹܐ ܕܓܵܢܵܝܗܝ ܒܹܐ ܙܕܥܘܿܬܵܐ؛ ܥܢܵܢܹ̈ܐ ܕܠܵܐ ܡܸܛܪܵܐ ܕܡ̣ܢ ܦܵܘܚܹ̈ܐ ܠܘܼܒܠܹܐ؛ ܐܝܼܠܵܢܹ̈ܐ ܕܬܫܹܪܝܼ ܒܹܐ ܡܲܗܨܘܼܠ؛ ܬܲܪ̈ܬܹܝ ܓܵܗܹ̈ܐ ܡܝܼܬܹܐ؛ ܘܦܠܝܼܛܹܐ ܡ̣ܢ ܥܸܩܪܵܝܗܝ؛ 13ܠܲܦܹ̈ܐ ܚܲܝܠܵܢܹ̈ܐ ܕܝܵܡܵܐ؛ ܕܒܝܼܲܕ ܓܸܒܘܼܢܬܵܝܗܝ ܟܹܐ ܡܲܚܙܝܼ ܢܚܸܦܬܵܝܗܝ؛ ܟܵܘܟܼܒܼܹ̈ܐ ܚܵܠܛܵܢܹ̈ܐ؛ ܐܲܢܹܐ ܕܡܝܼܫ ܕܚܘܼܒܼܝܵܐ ܕܠܥܵܠܲܡ ܐܸܠܵܝܗܝ ܢܛܝܼܪܬܵܐ ܝ݇ܠܵܗ̇. 14ܘܢܘܼܒܸܠܹܗ ܐܘܼܦ ܥܲܠ ܐܲܢܹܐ؛ ܗ̇ܘ ܕܝܼܠܹܗ ܕܫܵܒܼܥܵܐ ܡ̣ܢ ܐܵܕܵܡ؛ ܚܢܘܿܟܼ؛ ܟܲܕ ܐܵܡܸܪ؛ ܗܵܐ؛ ܐ݇ܬܹܐܠܹܗ ܡܵܪܝܵܐ ܒܪܸ̈ܒܵܘܵܬܹܐ ܕܩܲܕܝܼܫ̈ܘܼܗܝ؛ 15ܕܥܵܒܼܸܕ ܕܝܼܘܵܢ ܥܲܠ ܟܠܵܝܗܝ؛ ܘܡܲܢܟܼܸܣ ܠܟܠܵܝܗܝ ܟܵܦܘܿܪܹ̈ܐ؛ ܣܵܒܵܒ ܕܟܠܵܝܗܝ ܦܘܼܠܚܵܢܵܝ̈ܗܝ ܕܟܵܦܘܿܪܘܼܬܵܐ ܕܒܟܦܘܼܪܝܵܐ ܥܒܼܸܕܠܗܘܿܢ؛ ܘܣܵܒܵܒ ܕܟܠܵܝܗܝ ܗܹܡܸܙܡܵܢܹ̈ܐ ܩܸܫܝܹ̈ܐ ܕܗܘܼܡܙܸܡܠܗ݇ܘܿܢ ܥܲܠܘܼܗܝ ܚܲܛܵܝܹ̈ܐ ܟܵܦܘܿܪܹ̈ܐ. 16ܐܲܢܹܐ ܝ݇ܢܵܐ ܕܟܹܐ ܛܲܪܛܸܡܝܼ؛ ܘܟܹܐ ܩܵܒܼܠܝܼ؛ ܟܲܕ ܐܲܝܟܼ ܫܵܗ݇ܘܲܬܝܵܬܵܝ̈ܗܝ ܟܹܐ ܚܵܕܪܝܼ؛ ܘܦܘܼܡܵܝܗܝ ܟܹܐ ܗܲܡܙܸܡ ܗܹܡܸܙܡܵܢܹ̈ܐ ܪ̈ܵܡܹܐ؛ ܘܟܹܐ ܚܵܩܪܝܼ ܠܦܵܬܵܐ ܕܐ݇ܢܵܫܵܐ ܒܚܵܬܸܪ ܕܙܵܘܕܘܿܢܝܘܼܝܵܬܹ̈ܐ. 17ܐܝܼܢܵܐ ܐܵܚܬܘܿܢ؛ ܡܘܼܚܸܒ̈ܝܼ؛ ܕܟܼܘܿܪܘܿܢ ܠܗܹܡܸܙܡܵܢܹ̈ܐ ܐܵܢܝܼ ܕܩܵܕ݇ܡܵܝܬܵܐ ܦܸܫܠܗ݇ܘܿܢ ܐ݇ܡܝܼܪܹܐ ܡ̣ܢ ܫܠܝܼܚܹ̈ܐ ܕܡܵܪܲܢ ܝܼܫܘܿܥ ܡܫܝܼܚܵܐ؛ 18ܕܵܐܟܼܝܼ ܕܐܵܡܪܝܼ ܗَܘܵܘ ܠܵܘܟܼܘܿܢ؛ ܕܒܚܲܪܬܵܐ ܕܙܲܒܼܢܹ̈ܐ ܒܸܬ ܗܵܘܝܼ ܡܲܣܚܸܪ̈ܵܢܹܐ؛ ܕܐܵܙܠ݇ܝܼ ܒܵܬ݇ܪ ܫܲܗܘܲܬܝܵܬܵܝ̈ܗܝ ܕܟܦܘܼܪܝܵܐ. 19ܐܲܢܹܐ ܝ݇ܢܵܐ ܐܵܢܝܼ ܕܒܸܦܪܵܫܵܐ ܝ݇ܢܵܐ؛ ܢܲܦ̮ܫܵܢܵܝܹ̈ܐ؛ ܕܪܘܼܚܵܐ ܠܲܝܬ ܒܝܼܵܝܗܝ. 20ܐܝܼܢܵܐ ܐܲܚܬܘܿܢ؛ ܡܘܼܚܸܒ̈ܝܼ؛ ܒܗܲܝܡܵܢܘܼܬܵܘܟܼܘܿܢ ܩܲܕܝܼܫܬܵܐ ܒܵܢܝܼܬܘܿܢ ܓܵܢܵܘܟܼܘܿܢ؛ ܨܵܠܘܿܝܹܐ ܒܪܘܼܚܵܐ ܕܩܘܼܕܫܵܐ؛ 21ܓܵܢܵܘܟܼܘܿܢ ܒܚܘܼܒܹܗ ܕܐܲܠܵܗܵܐ ܢܵܛܪܝܼܬܘܿܢ؛ ܟܲܕ ܣܵܦܪܝܼܬܘܿܢ ܠܟܵܪܲܡܹܗ ܕܡܵܪܲܢ ܝܼܫܘܿܥ ܡܫܝܼܚܵܐ ܠܚܲܝܹ̈ܐ ܕܠܐܵܒܲܕ. 22ܘܠܚܲܕَܟܡܵܐ ܡܸܢܵܝܗܝ ܥܒܼܘܿܕܘܿܢ ܟܵܪܲܡ. ܟܲܕ ܡܲܩܪܘܼܨܹܐ؛ 23ܘܠܚܲܕَܟܡܵܐ ܒܙܕܘܿܥܬܵܐ ܦܵܪܩܘܿܢ؛ ܟܲܕ ܓ̰ܵܢܘܝܼܬܘܿܢ ܠܗ݇ܘܿܢ ܡ̣ܢ ܢܘܼܪܵܐ؛ ܟܲܕ ܣܵܢܝܼܬܘܿܢ ܐܘܼܦ ܠܨܘܼܕܪܵܐ ܕܡ̣ܢ ܒܸܣܪܵܐ ܠܘܼܟܼܸܢܬܵܐ ܝ݇ܠܵܗ̇. 24ܐܵܕܝܼܵܐ ܠܗ̇ܘ ܕܡܵܨܹܐ ܢܵܛܸܪܵܘܟܼܘܿܢ ܕܠܵܐ ܓ̰ܪܵܛܬܵܐ؛ ܘܡܲܩܸܡ ܠܵܘܟܼܘܿܢ ܩܵܕ݇ܡ ܦܵܬܵܐ ܕܚܸܩܪܹܗ ܕܠܵܐ ܠܵܘܡܵܐ ܒܦܨܵܚܬܵܐ؛ 25ܒܢܲܦ̮ܫܹܗ ܕܐܲܠܵܗܵܐ ܦܵܪܘܿܩܲܢ؛ ܒܝܼܲܕ ܝܼܫܘܿܥ ܡܵܪܲܢ؛ ܚܸܩܪܵܐ؛ ܘܓܘܼܪܘܼܬܵܐ؛ ܘܗܘܼܟܡܵܐ؛ ܘܚܲܝܠܵܐ؛ ܡܩܵܕ݇ܡ ܥܵܠܡܹ̈ܐ؛ ܐܘܼܦ ܐܵܕܝܼܵܐ؛ ܘܠܟܠܵܝܗܝ ܥܵܠܡܹ̈ܐ؛ ܐܵܡܹܝܢ.